សេចក្តីប្រកាសព័ត៌មាន៖ ឯកឧត្តមឧបនាយករដ្ឋមន្ត្រី ប្រាក់ សុខុន ធ្វើបទបង្ហាញជូនអង្គទូតបរទេស អំពីការអនុវត្តសេចក្តីថ្លែងការណ៍រួមទីក្រុងកូឡាឡាំពួរ
នៅថ្ងៃទី៨ ខែវិច្ឆិកា ឆ្នាំ២០២៥ ឯកឧត្តមឧបនាយករដ្ឋមន្ត្រី ប្រាក់ សុខុន បានធ្វើបទបង្ហាញសង្ខេបជូនអង្គទូតបរទេស ប្រចាំព្រះរាជាណាចក្រកម្ពុជា អំពីបច្ចុប្បន្នភាពនៃការអនុវត្តសេចក្តីថ្លែងការណ៍រួមទីក្រុងកូឡាឡាំពួរ រវាង កម្ពុជា និងថៃ ។ សេចក្តីថ្លែងការណ៍នេះ ដែលត្រូវបានចុះហត្ថលេខានៅថ្ងៃទី២៦ ខែតុលា ឆ្នាំ២០២៥ ផ្តល់ជាមូលដ្ឋានសម្រាប់កសាងទំនុកចិត្ត សន្តិភាព និងកិច្ចសហប្រតិបត្តិការឡើងវិញ។ ជំហានសំខាន់ៗរួមមាន៖ ការដោះលែងកងទ័ពកម្ពុជា ការដកអាវុធធុនធ្ងន់ ការដោះមីនមនុស្សធម៌ ការដោះស្រាយដោយសន្តិវិធីនៃបញ្ហាព្រំដែន កិច្ចសហប្រតិបត្តិការបង្ក្រាបឧក្រិដ្ឋកម្មឆ្លងដែន និងដំណើរនៃការធ្វើប្រក្រតីភាពនៃទំនាក់ទំនងការទូត។ កម្ពុជាបានអះអាងជាថ្មីនូវការប្តេជ្ញាចិត្តរបស់ខ្លួនក្នុងការប្រែក្លាយតំបន់ព្រំដែនទៅជា តំបន់សន្តិភាព និងបានថ្លែងអំណរគុណដល់ ម៉ាឡេស៊ី សហរដ្ឋអាមេរិក ចិន ព្រមទាំងមិត្ត និងដៃគូទាំងអស់ចំពោះការគាំទ្រ ក្នុងការសម្រេចបាននូវបទឈប់បាញ់ និងសេចក្តីថ្លែងការណ៍រួមទីក្រុងគូឡាឡាំពួ។
ក្រសួងការបរទេស និងសហប្រតិបត្តិការអន្តរជាតិ
